''Gündəlik Bakı'' olaraq ötən yazılarımızda  Maliyyə Nazirliyinin Qaçqınların və Məcburi Köçkünlərin İşləri üzrə Dövlət Komitəsində ( “Qaçqınkom”da ) yoxlama aparması barədə məlumat vermişdik. 
Məlumat üçün bildirmişdik ki, son bir neçə ildə Maliyyə Nazirliyinin “Qaçqınkom”da  ciddi yoxlama aparması heç kimin yadına gəlmir. 
Həqiqətən də bütün dövlət  qurumlarında  zaman-zaman operativ, illik yoxlamalar olduğu halda sanki  “Qaçqınkom”  toxunulmaz  qurum kimi yoxlamalardan kənarda qalırdı. Hətta Milli Məclisin tribunasından bir çox nazirlik və komitələr ciddi tənqid olunsa da “Qaçqınkom”a  gözün üstə qaşın var deyən yox  idi. 
Hansı ki, bu qurum dəfələrlə yazdığımız kimi rüşvətin və korrupsiyanın miqyasına görə ölkədə birinci yerdədir. 
Belə olduğu halda  “Qaçqınkom”  niyə yoxlamalardan kənarda qalmalı idi. 
Hətta  Rövşən Rzayev komitəyə sədr təyin olunandan sonra qurumda özbaşınalıq, korrupsiya halları  birə beş artsa da Maliyyə Nazirliyi bu quruma sanki həmişəlik yaşıl işıq  yandırmışdı. 
Amma bir müddət əvvəl  Maliyyə Nazirliyi “Qaçqınkom”da yoxlamalarla bağlı qərar verdi. Görünür yazılan məqalələr, məcburi köçkünlərin şikayətləri nəhayət yuxarılara yetişmişdi. 
Və ölkə rəhbərliyi səviyyəsində məlum olmuşdur ki, başda komitə sədri Rövşən Rzayev olmaqla, müavinləri Fuad Hüseynov, Sabir Əhmədov, Aparat rəhbəri Eldar Zeynalov, Mənzil Departamentinin direktoru Səbuhi Əhmədov və ən əsası Məcburi Köçkünlərin Sosial İnkişaf Fondunun rəhbəri, deputat Mahir Abbaszadə qaçqınlara dövlət tərəfindən ayrılan pulların hesabına milyonçuya çevriliblər. Məcburi köçkünlər üçün tikilən mənzillərin, qaçqın şəhərçiklərindəki obyektlərin pulla satılması, qaçqınlar üçün tikilən qəsəbələrə, şəhərciklərə ayrılan 100 milyonların öz yaxınlarına tender vasitəsilə verilməsi böyük cinayət əməlidir. 
Qoy Maliyyə Nazirliyi hər ay verilən 60 milyon “çörək pulu”nun içərisində “ölü canlar”ın sayını  və “summa”sını müəyyən etsin. 
Görəsən, bu “ölü canlar”ın  qazını, işığını, suyunu kim istifadə edir, yaxud bu pullar kimlərin cibinə gedir ? 
Təxminən son 30 ildə qaçqın və məcburi köçkünlərə, onlar üçün tikilən binalara, qəsəbələrə, şəhərciklərə ayrılan milyardlarla dövlət vəsaitini beyninizdən keçirin. 
Bu binalardakı mənzilləri satan, şəhərciklərin həyətini ticarət obyekti kimi hərraca çıxardan Departament direktoru  Səbuhi Əhmədovu gözünüzün önünə gətirin. 
Adam rüşvətin çoxluğundan az qala havalanıb, eşqə düşüb, xaricdəki  “söyüş müxalifəti”nə  maliyyə dəstəyi verir, məcburi köçkünlərə  5000 manata “kupça” satır. Yəqin ki, Maliyyə Nazirliyinin yoxlama  materiallarında  bu faktlar öz əksini  tapacaq.
Komitənin “rüşvət və  korrupsiya  dənizi “  hesab olunan   Məcburi Köçkünlərin Sosial İnkişaf Fondunun direktoru, millət vəkili Mahir Abbaszadənin  əməlləri də yəqin ki, yoxlama sənədlərində qırmızı xətlə keçəcək. 
Bu adam o dərəcədə milyonçuya çevrilib ki, iki həftə əvvəl, daha dəqiq desək, 14 iyun 2021-ci il tarixdə həyat yoldaşına keçirdiyi möhtəşəm ad günündə ( 42 yaş ) xanımına   420000 yevro dəyəri olan  hədiyyə bağışlayıb. 
Təkcə bu fakt   “Qaçqınkom”dakı  rüşvətin və korrupsiyanın miqyasını göstərir. 
Biz kiminsə xanımına  lap 1 milyonluq hədiyyə bağışlamasının əleyhinə deyilik. Amma qaçqın və məcburi köçkünlərə ayrılan dövlət vəsaiti ilə deyil.  
Komitə sədri Rövşən Rzayev deyir ki, maaşımla dolanıram. Bəlkə Səbuhi Əhmədov da, Mahir Abbaszadə də quru maaşla dolanır, cənab Rzayev ? 
Bəlkə, müavinləriniz, Fuad Hüseynov, Sabir Əhmədov, Aparat rəhbəri Eldar Zeynalov  maaş cədvəlinə qol çəkir ? 
Bir daha təkrar edirik ki, “Qaçqınkom”  böyük rüşvət, korrupsiya və cinayətlər  yuvasıdır. 
Xarici beynəlxalq humanitar qurumlardan gələn  yardımlar haradadır, cənab Rövşən Rzayev ? 
Bunu heç bir məcburi köçkün görməyib. 
Sözün qısası ümid edirik ki, Maliyyə Nazirliyinin apardığı yoxlama  öz müsbət nəticəsini verəcək. 
Çünki redaksiyamıza  daxil olan məlumata görə, yoxlamanın materialları Baş prokuror yanında Korrupsiyay qarşı Mübarizə İdarəsinə göndərilib. 
Məlumatlı mənbənin dediyinə görə, komitə rəhbərliyinin həbsi gözlənilir. 
Bəlkə də qohumları Rövşən Rzayevi həbsdən xilas edə bildi, ancaq Səbuhi Əhmədov, Mahir Abbaszadə və digərlərinin həbsi qaçılmazdır.