"Dünyada koronavirusa (COVID-19) qarşı vaksinin tapılması mühüm yenilikdir. Bu vaksin bərabər şəkildə bütün insanlara vurulsa, 2021-ci ildə qlobal turizm gəlirləri 3 trilyon ABŞ dollarına çata bilər ki, bu da 2019-cu ildəki göstəricinin 75% bərpa edilməsi deməkdir".
Türkiyədə fəaliyyət göstərən Dünya Forumu İnstitutunun rəhbəri Bulut Bağcı deyib.
"2022-ci ildə isə dünyada turizmdən 5 trilyon dollar gəlir əldə ediləcəyi gözlənilir", - deyə o, qeyd edib.
Xatırladaq ki, koronavirus pandemiyası ilə bağlı tətbiq edilmiş məhdudiyyət bu ilin yanvar-oktyabr aylarında qlobal turizm gəlirlərinin ötən ilin eyni dövrünə nisbətən 935 milyard dollar az olması ilə nəticələnib. Bu barədə Birləşmiş Millətlər Təşkilatının Dünya Turizm Təşkilatı (UNWTO) məlumat yayıb.
Məlumata görə, 10 ay ərzində turizm obyektləri illik müqayisədə 900 milyon nəfər az turist qəbul edib. Bu isə 1990-cı ildəki səviyyə ilə eynidir. 2020-ci ilin sonuna qədər beynəlxalq səyahətlərin sayının 2019-cu illə müqayisədə 70-75% az olacağı gözlənilir. Ötən il dünyada 1,5 milyard səyahət baş tutub. (Report)