Artıq neçə müddətdir Azərbaycanda koronavirusa yoluxma sayı iki min civarında olur.

Bəzi yumşalmalar olsa da, insanlar həmişəki kimi açıq havada maska taxmaq məcburiyyətindədirlər.

Dünyada artıq koronavirusun 3 və 4-cü dalğasının müşahidə olunduğu ölkələr var.

Azərbaycanda koronavirusun neçənci dalğasıdır və virusla mübarizə necə gedir?

Bununla bağlı Cebhe.info-ya açıqlamasında tibb elmləri doktoru, professor Adil Qeybulla bildirib ki , Azərbaycanda koronavirusun üçüncü dalğasının pik mərhələsini yaşayırıq:

“Müsbət tendensiyalar müşahidə edilir. Bəzən sağalma sayı yoluxma sayını üstələyir. Lakin hələlik yoluxma tendensiyasında ciddi eniş yoxdur”.

Professorun sözlərinə görə, yaxın on gün ərzində yoluxanların sayında ciddi eniş müşahidə edilməlidir: “Hesab edirəm ki, koronavirusun üçüncü dalğasından sonra həm vaksinasiya olunmuş insanların sayı, həm də COVİD-ə yoluxub immunitet qazananların hesabına xəstəliyə qarşı kollektiv immunitet əldə edəcəyik. Bunun nəticəsində ya tək-tük xəstəliyə tutulanlar olacaq, ya da bu virusla vidalaşmalı olacağıq”.