“İlk növbədə politoloq olaraq internet televiziyalarında çıxışlarım, debatlarımda dəfələrlə proqnoz vermişdim ki, Rusiya və Ukrayna arasında bu gərginliyin tranformasiyası, müharibəyə keçidi labüddür”.
Bunu Milli Məclisin deputatı Elman Nəsirov hazırda davam edən Rusiya- Ukrayna müharibəsindən danışarkən deyib:
“Səbəbin əsaslandırmışdım ki, məsələ Rusiya siyasi rəhbərliyinin qondarma Luqansk və Donsetsk respublikalarının müstəqiliyini tanıması, dinc əhalinin intensiv şəkildə buradan çıxarılması ilə nəticələnəcək. ABŞ, NATO rəhbərliyinin və digər Qərb ölkələri liderlərinin Ukrayna ilə müharibənin baş verməsinin tarixini belə bildirməsi, eyni zamanda Rusiya Prezidentinin rus xalqına son müraciətindən sonra qənaətə gəlmək olardı ki, müharibə artıq qaçılmazdır. Bu gün səhər saatlarında Rusiya Silahlı Qüvvələri Donetsk ərazisində xüsusi əməliyyata başlayıblar. Bu hərbi əməliyyatlar 2015-ci ildə Rusiyanın Suriyada tətbiq etdiyi hərbi əməliyyatlar taktikasına çox bənzəyir. O zaman da Rusiya nöqtə zərbələrdən istifadə edir, strateji əhəmiyyətli obyektləri məhv edirdi. Qarşı tərəfin də məğlubiyyəti bu zaman labüd olurdu. Rusiya nöqtə zərbələrlə strateji obyektləri - hava limanlarını, hərbi sursatların saxlanıldığı obyektləri, anbarları, zavodları, hərbi hissələri dəqiq məhv edir. Belə olan vəziyyətdə hesab edirəm ki, Qərb, NATO, ABŞ-ın sanksyalarla məsələnin həllinə nail olacağı fikri yanlışdır”.
Deputatın fikrincə, Rusiya kimi nəhəng dövləti sanksyalarla təslim və nəyəsə məcbur etmək mümkün deyil:
“İlin əvvəlində 300-340 dollara bərabər olan 1 kubmetr qazın getdikcə 2000, hətta 3000 avroya çatacağı proqnozlaşdırılır. Bu, nəhəng neft-qaz ölkəsi olaraq Rusiya üçün böyük maliyyə axını deməkdir. Bu təzyiqlərlə Rusiyanı ram etmək mümkün deyil. Mənə elə gəlir ki, ən yüksək səviyyədə Rusiya-ABŞ-NATO danışıqları olmalı və kompromis əldə edilməlidir. Rusiyanın mövqeyi belədir ki, NATO Şərqə doğru genişlənməsin, Ukrayna NATO-ya üzv qəbul edilməsin. Bundan əlavə, Ukraynada NATO ölkələrinin strateji silahları yerləşdirilməməlidir. Mənə elə gəlir ki, bu məsələlər ətrafında kompromis əldə edilmədən mövcud problemin həllini tapması qeyri- mümkündür. Azərbaycan Xarici İşlər Nazirliyi Ukraynada yaşayan soydaşlarımıza xüsusi ehtiyac olmadan evlərini tərk etməməklə bağlı müraciət edib.
Xüsusilə də Rusiyanın dəqiq zərbələr endirməsini nəzərə alaraq hərbi hissələrdən, zonalardan uzaq məsafədə olmaq lazımdır. Azərbaycanın Kiyevdəki səfirliyi və Xarkovdakı konsulluğu ilə mütəmadi əlaqələr saxlamaq lazımdır. Maksimum çalışmaq lazımdır ki, mürəkkəb şəraitdə soydaşlarımız öz təhlükəsizliklərini təmin etsinlər. Azərbaycanın Rusiya ilə müttəfiqlik haqqında imzaladığı bəyannamə indiki vəziyyətdə ölkəmiz üçün heç bir təsir yaratmır”.
Parlement üzvü hesab edir ki, Azərbaycan onsuz da Rusiya ilə dostluq münasibətlərində olan dövlətdir:
“Biz Rusiya ilə həm streteji əməkdaş idik, indi müttəfiqə çevrildik. İmzalanmış sənəd heç bir halda 3-cü dövlətə qarşı yönəlməyib. Bu, sırf ikitərəfli münasibətləri xarakterizə edən, yeni mərhələyə qaldıran sənəddir. Azərbaycanla Rusiya arasında 1997-ci il iyulda imzalanmış müqavilə dostluq, əməkdaşılıq, qarşılıqlı təhlükəsizik haqqındadır. 2008-ci ildə imzalanmış digər bir sənəd də var ki, bu da Azərbaycanla Rusiya arasında dostluq və strateji əməkdaşlıq haqqındadır. Bu sənədlər göstərir ki, biz onsuz da Rusiya ilə dost dövlət idik. Bu kimi məsələlərin bizim üçün heç bir təhlükəsi yoxdur. Sadəcə, Azərbaycan ilk növbədə regionda sülh və təhlükəsizliyin bərpasını, Rusiya və Ukrayna arasındakı müharibənin sülh, dinc yolla tənzimlənməsini istəyir.
Bu prosesə töhfə də verə bilər. Azərbaycan hazırkı vaxtda iki slavyan ölkəsi arasında yaranmış müharibə vəziyyətində nə Rusiyanın, nə də Ukraynanın yanında yer alacaq. Bu, bəlli həqiqətdir. Biz beynəlxalq hüququn yanında yer alırıq. Azərbaycan Rusiyanın da, Ukraynanın da ərazi bütövlüyünü tanıyır. Azərbaycana Ukrayna tərəfindən müracət olarsa, hesab edirəm ki, yaranmış münaqişənin aradan qaldırılmasına xidmət edəcək addımlar atılacaq. Bu, siyasi dialoq, qarşılıqlı kompromislər, dinc yola məsələnin həllinin tapılmasını özündə ehtiva edən nəsə ola bilər”.