Ermənistana Gəncə mesajı: “Başınıza od yağdıracağıq!”
18-09-2020, 23:12
144

Ermənistana Gəncə mesajı: “Başınıza od yağdıracağıq!”

Azərbaycan-Ermənistan cəbhəsində vəziyyət gərgin olaraq qalır. İşğalçı ölkənin Tovuz istiqamətində törətdiyi təxribat nəticəsində gizirimizin yaralanmasına cavab olaraq bir gün sonra düşmənin bu istiqamətdə müqaviləli hərbçisi məhv edilib.
Məlumata görə, erməni çavuş Azərbaycan mövqelərinə minaatandan atəş açmaq istərkən snayperimizin hədəfinə tuş gəlib. Bunun qarşılığında işğalçı ölkənin müdafiə naziri David Tonoyanın həyasızcasına Azərbaycanı hədələməsi və “adekvat cavab veriləcəyini” deməsi Ermənistanın ötənlərdən dərs çıxartmadığını nümayiş etdirir. Azərbaycan ərazilərini işğalda saxlayan İrəvan üstəlik, ölkəmizdən beynəlxalq təşkilatlara və həmsədr ölkələrə də şikayət edib. Ermənistanın Qarabağın hüdudarından kənar istiqamətdən aylardır davam etdirdiyi təxribatlara biganə yanaşan Minsk Qrupunuun həmsədrlərinin isə deyəsən “donu” açılıb. Vasitəçilərin və ATƏT sədrinin şəxsi nümayəndəsi Anjey Kasprşkin bir araya gələrək bölgədəki vəziyyəti müzakirə etməsi və danışıqlarla bağlı növbəti təşəbbüs səsləndirmələri də heç şübhəsiz, Azərbaycanın işğalçıya hər an sarsıdıcı zərbələr endirməyə hazır olması ilə bağlı ortaya qoyduğu qəti mövqedən yaranan narahatlığın məntiqi nəticəsidir.
Sentyabrın 16-da cəbhədəki son vəziyyətə toxunan müdafiə naziri Zakir Həsənov şəxsi heyətin döyüş hazırlığını və ayıq-sayıqlığını yüksək səviyyədə saxlamağı, eləcə də Ermənistan silahlı qüvvələrinin müxtəlif istiqamətlərdə törədə biləcəyi genişmiqyaslı təxribatların qarşısının dərhal və qətiyyətlə alınmasını əmr edib.
Sentyabrın 15-də, Bakının işğaldan azad edilməsi münasibətilə Gəncədə keçirilən mərasimdə Türkiyə və Azərbaycan şahinlərinin birlik nümayişi də təsadüfi deyildi. Qeyd edək ki, 21 avqust 2001-ci il tarixində Türkiyə Hərbi Hava Qüvvələrinin “Türk Ulduzları” akrobatik qrupu Bakı səmasında ilk dəfə möhtəşəm uçuşları ilə təkcə milyonları heyrətləndirən şou göstərməmişdi. Əslində “Türk şahinləri” Bakı üzərində uçuşlar edəndə mesajın hansı ölkəyə yönəldiyi məlum idi. Elə iki il öncə, Azərbaycan Xalq Cümhuriyyətinin və Milli Ordumuzun yaradılmasının 100 illiyi şərəfinə, Türkiyə və Azərbaycan prezidentlərinin iştirakı ilə keçirilən hərbi parad zamanı nümayiş olunan uçuşlarda da əsas məqsəd dost-düşmənə ali mesajın verilməsi idi. Növbəti uçuşlara iyul-avqust aylarında birgə hərbi təlimlər zamanı şahidlik etdik. Amma 15 sentyabrda Azərbaycanın birinci paytaxt şəhəri - Gəncə üzərində iki qardaş ölkənin pilotlarının birgə uçuşlarında hədəf daha konkret idi. Bu mesaj birbaşa “Gəncəni də vuraraq” kimi sərsəmləyən erməni hakimiyyətinə yönəlmişdi. Tovuz döyüşlərindən sonra Ermənistan tərəfi Azərbaycanın işğal edilmiş ərazilərində yaratdığı qanunsuz rejimin qondarma “başçısı” vasitəsilə Azərbaycanın Gəncə şəhərinə hərbi zərbə endirməklə təhdid etməyə cəhd edirdi. Əslində bu, Araik Arutyunyanın “başının və ağlının məhsulu” deyildi, bunu ona dedirdən qüvvələr var idi. Ermənistanı Tovuz istiqamətində hücuma keçməyə sövq edənlər ardınca da “Gəncəni vurmaq” kimi avantürist hədələrin yayılmasına stimul verdilər.
Hətta “Gəncə qədim erməni şəhəridir” kimi sərsəm iddialar da erməni mediasında tirajlanmağa başladı. Elə bu səbəbdən də Türkiyə və Azərbaycanın qırıcı və döyüş helikopterləri R.T.Ərdoğanın sözləri ilə desək, Ermənistanın və Qarabağ separatçılarının “boyunu aşan” iddiaya məhz bu sayaq cavab verdilər. Heç şübhəsiz ki, 15 sentyabrdan bir gün sonra ermənilərin yenidən Gəncəyə yaxın cəbhə zonası olan Tovuzda vəziyyəti gərginləşdirmək istəyi də bu uçuşlara verilən qıcıqlı reaksiyadır. Lakin düşmən ilk itkisini verdi və azğınlığını davam etdirdikcə, itkiləri artacaq. Rəsmi Bakı hələ avqust ayında erməni terrorçularının Gəncəni təhdid etməsinə cavab olaraq bəyanat verərək, beynəlxalq təşkilatların diqqətini bu məsələyə yönəltməyə çalışmışdı. Lakin “ağaları” başda olmaqla, heç bir qurum və ya vasitəçi Ermənistana “ağlını başına yığ” demədi. Ancaq bu xəbərdarlığı yalnız iki dövlət edir: Azərbaycan və Türkiyə. Elə iki gün qabaq Türkiyənin Bakıdakı səfirinin İrəvana xəbərdarlığı da təsadüfi deyildi.

Hərbi ekspert Azad İsazadə “Yeni Müsavat”a bildirdi ki, Gəncə həmişə ermənilərin hədəfi altında olub: “Gəncə cəbhə zonasına nisbətən yaxın ərazidir, istər Azərbaycan-Ermənistan sərhədi, istər Kəlbəcər, istərsə də Qarabağ istiqamətindən. Ermənlər həmişə iddia edirdilər ki, biz Gəncəyə qədər gedə bilərik, hətta Gəncəni ”erməni şəhəri" hesab edirlər. Bu mənada Gəncə daim təhlükə altında olub. Biz nümayiş etdirməliyik ki, Gəncə təhlükəsiz bir yerdir. Odur ki, raket zərbəsi, tank və ya quru qoşunlarının hücumlarını dəf etmək üçün hazırlığımızı nümayiş etdirməliyik. Sabah irimiqyaslı döyüşlər başlasa, biz düşməni Gəncəyə yaxın buraxmamalıyıq". Türkiyənin bu prosesdə iştirakına, Türk təyyarə və helikopterlərinin Gəncə üzərindəki uçuşlarına gəldikdə, ekspert dedi ki, söhbət təkcə Gəncənin müdafiəsindən getmir: “Türkiyə bununla demək istəyir ki, biz bütün Azərbaycanı müdafiə etməyə hazırıq! İstəyir Gəncə, istər Naxçıvan olsun, istərsə də Qarabağın azadlığı olsun. Bu, ermənilərə ciddi xəbərdarlıqdır”.

Ehtiyatda olan zabit, hərbi ekspert Şair Ramaldanov, mütəmadi şəkildə təxribatlara əl atan düşmənə qarşı bundan sonra da layiqli cavab veriləcəyini vurğulayıb: “Təmas xəttində əməliyyat şəraitinə Azərbaycan bölmələri nəzarət edir. Bu gün ordumuzun arsenalında olan müasir müşahidə vasitələri hərbçilərimizə düşmənin istənilən hərəkətini müşahidə etmək imkanı verir. Təbii ki, düşmənin hərəkəti müşahidə edilən zaman qabaqlayıcı tədbirlər də görülür. Məhz bu yolla mümkün təxribatların qarşısı alınır. Hansı ki, düşmən hər an təxribat törətməyə fürsət axtarır”.
Ermənistanın baş naziri Nikol Paşinyan hakimiyyətdə olduğu iki ildən artıq dönəmdə müxtəlif oyunbazlıqlarla ictimaiyyətin diqqətini özündən yayındırmağa çalışıb. Elə cəbhədə vəziyyətin gərginləşməsi də Paşinyan hakimiyyətinin ömrünün uzanmasına xidmət edir. Əvvəlcə sülh nağılları danışan Nikolun daha sonra oğlunu Qarabağa əsgər göndərməsi, bu günlərdə isə onun arvadının avtomat götürüb işğal zonasındakı təlimlərə qatılması heç şübhəsiz erməni xalqı üçün düşünülmüş şounun tərkib hissəsiydi. Ancaq belə görünür ki, bütün bu oyunbazlıqlar Paşinyanı xilas etməyəcək.
Hər halda, Ermənistanın iri oliqarxlarından biri, “Çiçəklənən Ermənistan” Partiyasının lideri, N.Paşinyan tərəfindən mandatı əlindən alınan Qagik Tsarukyan baş nazirə güzəştə getmək fikrində deyil. “Yeni Müsavat” erməni mediasına istinadən xəbər verir ki, müxalifət lideri N.Paşinyana qarşı daha sərt şəkildə mübarizə aparacağını nümayiş etdirməkdədir. Müxalifət liderini 1979-cu ildə təcavüz etməkdə suçlayan baş nazirə cavabında Tsarukyan deyib ki, ciddi psixi problemləri olan adamlar yüksək dövlət postlarını tutmalı deyillər. Tsarukyanın nəzərincə, belələri ölkənin və vətəndaşların təhlükəsizliyini təhdid edir.
Göründüyü kimi, nə Qarabağ klanının liderlərinə qarşı açdığı məhkəmə davası, nə diqqətin xarici düşmənə - Azərbaycana yönəldilməsi cəhdləri, nə də koronavirus N.Paşinyana qarşı etirazları arxa plana keçirmir. Belə davam edərsə, N.Paşinyan hakimiyyəti rüşvayçı şəkildə tərk etməli olacaq...

“Yeni Müsavat”

Oxşar xəbərlər

“Ermənistanın Qarabağ münaqişəsinin mərhələli həllini rədd etməsi danışıqları alt-üst edir”
Daha bir erməni əsgər öldü
Rəsul Quliyevin işğalçı Ermənistan spikeri ilə birgə görüntüləri yayıldı...- FOTOLAR
Müharibə başlasa... - Ermənistanda daş üstdə daş qalmayacaq
XİN: Ermənistanın Şuşada məscid "təmir" edərək guya ki, dini dəyərlərə hörmət nümayiş etdirmək cəhdi riyakarlıqdır
“Azərbaycan balanslaşdırılmış siyasət yürütmür” - Deputat
Ermənilər İrana gedən avtomobil yolunu bağladı
"Şuşada yallı gedən Ermənistana..." - ATƏT-in Minsk qrupu özünü təlxək yerinə qoyub?
“Ermənistan Azərbaycandan layiqli cavabını alacaq” – Millət vəkili
Azərbaycandan Ermənistanla bağlı SƏRT AÇIQLAMA: "Əvvəl-axır işğalçı cavab verəcək"
Azərbaycanlı xanımlardan Akopyanın silahlı fotosessiyasına ETİRAZ
Ermənistan rus silahlarından imtina edir? – Tonoyandan şok açıqlama
"Paşinyan münaqişənin həllinə mane olur, hətta genişmiqyaslı müharibənin başlanması üçün..."
Ceyhun Bayramov İtaliya səfiri ilə görüşüb
“Paşinyan utanmazcasına danışıqların məqsədini təhrif edib” - Məmmədyarov
“Azərbaycan ordusu çox ayıq-sayıqlıq göstərdi” – Millət vəkili
Azərbaycan Ermənistanın iki zabitini beynəlxalq axtarışa verdi
Azərbaycan və Ermənistan xarici işlər nazirlərinin görüş vaxtı məlum oldu
"Rusiya Azərbaycanın faydalı əlaqələrə malik olduğu əsas tərəfdaş ölkələrdəndir"
Təmas xəttində keçirilən monitorinq insidentsiz başa çatıb
Məşhur nəvə toyundan sonra qeybə çəkilən Əli Əhmədov da SÜKUTU POZDU - Və ATƏT-in susqunluğundan yazdı...
Avropadan Bakıya müharibə üçün “yaşıl işıq”
İcma qondarma "seçkilərlə" bağlı bəyanat yaydı
Gürcüstan Ermənistanın səhiyyə nazirinə cavab verdi
“Sergey Şoyqu bu gün Azərbaycana gəlməzdən əvvəl Ermənistanın Müdafiə naziri ilə danışıb” - Politoloq
"AŞPA elə bil, erməni diasporalarının sifarişini yerinə yetirir"
Bu gecə 10 erməni əsgəri yaralanıb: Birinin vəziyyəti ağırdır - Rəsmi
İlham Əliyev Paşinyana cavab verdi: "Qarabağ- Bu Azərbaycandır və nida işarəsi”
XİN: Ermənistanın təhrikedici cəhdləri ilə bağlı həmsədrlər məlumatlandırılıb