Azərbaycanın aparıcı banklarından olan “Xalq Bank” ASC “Azərxalça” ASC-nin sabiq sədri Vidadi Muradovun oğlu Aydın Muradovu məhkəməyə verib.
Yeniavaz.com xəbər verir ki, dekabrın 12-də Bakı Kommersiya Məhkəməsində hakim Leyla Əliyevanın sədrliyi ilə hazırlıq iclası keçiriləcək.
“Xalq Bank” ASC-nin iddiası kredit müqaviləsi üzrə mübahisələrlə bağlıdır.
Bank Aydın Muradovla bərabər “Azər İlmə” MMC və Muradova Rəhilə Cəbrayıl qızı barəsində də iddia qaldırıb.
Məlumat üçün bildirək ki, “Azər İlmə” MMC Vidadi Murodov tərəfindən 1994-cü ildə təsis olunub. Nizamnamə kapitalı 683 min 616 manat olan MMC-nin hazırda dövlət büdcəsinə 1 milyon 80 min 252 manat 37 qəpik vergi borcu da var.
Qeyd edək ki, tarix elmləri doktoru olan Vidadi Muradov 9 yanvar 2021-ci ildə külli miqdarda mənimsəmə ittihamı ilə həbs olunub. 31 oktyabrda səhhəti ilə əlaqədar həbsdən azad edilib və 5 gün sonra - 4 noyabr 2021-ci ildə xərçəng xəstəliyindən vəfat edib.
Vidadi Muradovun oğlunu məhkəməyə verən “Xalq Bank” ASC 2004-cü ildə təsis olunub. “Xalq Bank” ASC-nin səhmdarları “İdeal Biznes Ko” MMC (50%), “Yevro Standart” MMC (33,85%) və “AMAL İnvest Qrup” MMC olub. “Xalq Bank” ASC-nin hesabatında hər iki şirkətin hüquqi ünvanı kimi “Neftçilər prospekti 153” göstərilir. Bu ünvanda həm də ölkənin aparıcı şirkətlərindən olan “Paşa Holdinq” yerləşir. “Xalq Bank” ASC-nin hesabatında həmçinin qeyd olunur ki, bankın yekun mülkiyyətçiləri Bank üzrə birgə nəzarəti həyata keçirən Leyla Əliyeva və Arzu Əliyevadır.