Dünyanı ağuşuna alan COVİD-19 insandan insana sürətli yoluxur.Məhz ona görə də koronavirusun daha geniş yayılmaısna qarşı preventiv tədbirlər görülür. Çünki xırda bir ehtiyatsızlıq üzündən virusa yoluxma sayı rekord həddə çata bilər. Bu mənada hər kəsdən məsafə saxlamaq, maska taxmaq və digər qoruyucu elementlərdən istifadə etmək tələb olunur. İnsanların bir-biri ilə ən yaxın məsafədə işlədiyi məkanlara - gözəllik salonları, bərbərxanalar və stomatologiya mərkəzləri də daxildir. Diş müalicələri zamanı istifadə edilən alətlərlə bir çox mikroorqanizm, virus ilə aerozol şəklində ağıza sərbəst buraxıla , yaxud da salonlarda istifadə edilən ləvazimatlardan virusa yoluxma halı baş verə bilər.

İnsanlar isə stomatologiya mərkəzlərinə mütəmadi müraciət edir. Koronavirus təhlükəsinin olduğu dövrdə bu kimi mərkəzlərdən istfadə edən insanların sağlamlığı üçün qabaqlayıcı tədbirlər görülməlidir. Maraqlıdır, bu istiqamətdə nə kimi ölçülər götürülür və hansı önləyici addımlar atılır?

Bu barədə "Sherg.az"a danışan həkim Şəmsiyyə Namazlı deyib ki, bunu insanların özləri tələb etməlidir:

"Müəssisələr içərisində birinci növbədə stomatoloji mərkəzləri qaydalara riayət etməlidir. Müşahidələrimə görə deyə bilərəm ki, özəl stomatoloji mərkəzlərdə bu qaydalara əməl olunur, digərlərini deyə bilmərəm. Özəl klinikaların bəzilərində xəstə gəlir, yanında da 3 nəfər daxil olur. Xəstəni gətirənlər kənarda gözləməlidir. Banka sənəd almağa gedəndə 3 nəfər gedirsiz? Yox, bu da elədir.

Ona görə də "reception"da qarışıqlıq olur. Bunu hər müəssisəyə aid etmək olmaz, əlbəttə, istisnalar var.

Bəzən görürəm ki, stomatoloji mərkəzdə hər şey qaydasında olur, lakin klinikaya, qeydiyyat şöbəsinə daxil olanda isə orada əyləşən qızlarda tibbi maska olmur.

Pandemiya dövrü olmadığı vaxtda da hepatitlərin yayılmasından qorxurduq. Hər zaman pasient stola oturmazdan əvvəl həkimin istifadə edəcəyi alətlər onun gözü qarşısında açılır, strellizasiya edilir. Bunu pasientin özü də tələb etməlidir".