Bu boyda cinayətdən “Azəriqaz”ın, “Azərsu”nun, “Azərmeliorasiya”nın xəbəri olmayıb..? 

Bunu araşdırmaq üçün möhtəbər  dövlət komissiyası  yaradılmalıdır...


Məlumat üçün  qeyd edək ki, SSRİ adlı  dövlətdə  istənilən situasiyaya hazır olmaq üçün  qaz, su, meliorasiya  xətləri alternativ çəkilirdi. 
Lap loru dildə desək, qaz, su, yaxud suvarma xətlərində  qəza  halı baş verərdisə, o anda  alternativ xətt işə düşürdü. 
Bir az da  sadə dildə deyək. Əgər  qışın soyuğunda  hansısa qaz xəttində  avariya-qəza  baş veribsə və bunu aradan qaldırmağa  saatlar, günlər lazım olacaqsa...vətəndaş  qışın soyuğunda donmalı deyildi ki ?
Deməli,  belə hallar üçün alternativ-paralel  xətlər var idi. Və qəza halında həmin xətlər avtomatik işə düşürdü, insanlar da əziyyət çəkmirdi. 
Bunları yazmaqda məqsədimiz odur ki, SSRİ dağılanda Azərbaycanda yerin altında  bəlkə də milyon kilometrlərlə  alternativ qaz, su, meliorasiya  turbaları var idi. 
Bizim bəzi dövlət məmurları düşündü ki, bu alternativ  turbaları doğrayıb  “metallom” kimi  satmaq və...100 milyonlar qazanmaq olar. 
Belə faktlar 5-10-15 deyil...
Biz belə faktlardan bir neçəsini oxucuların nəzərinə çatdırmaq istəyirik. 
Bu barədə bütün ölkə mətbuatı illərdir yazır. 
Məsələn,  mətbuatın  yazdığına görə, Şirvanın sabiq, Zərdabın indiki icra başçısı olan Mərdan Camalov Şirvanda 3 kilometr, yəni 3000 metr uzunluğunda yeraltı qaz turbasını doğratdırıb və satdırıb. 
Yuxarıda dediyimiz kimi bu alternativ qaz xətti  idi. 
Təsəvvür edirsiniz, bütün xalqın, cəmiyyətin, dövlət qurumlarının gözü qarşısında 3000 metr uzunluğunda, iridiametrli qaz turbalarını rayon prokurorunun razılığı ilə doğrayıb satırlar. Bu biznesə hətta o zamankı baş prokuror Zakir Qaralov da şərik olur.
O zamandan Mərdan Camalov sözün həqiqi mənasında milyonçu olur.
Məsələ turba ilə bitmir.
Mərdan Camalov Şirvanın o zamankı Hüquq Mühafizə Orqanları ilə birgə rayon ərazisindəki, beton zavoduna gedən dəmir yolu relslərini də doğrayıb satdırır.
İndi gördünüzmü, məsələ təkcə qaz, su turbası deyil, bunlar dəmir yolu, tramvay relslərini də satıblar. 
İndi keçək başqa bir misala. Bu dəfə qaz yox, SU  turbalarından bəhs edək...
Bəli, Masallının indiki icra başçısı Şahin Məmmədov Ağcabədinin icra başçısı olarkən, Qarqar çayından rayon mərkəzinə gələn 18 km uzunluğunda su borularını çıxararaq satıb.
Təsəvvür edirsiniz, 18 km uzunluğunda  su borularını  doğrayıb satırlar və bir dövlət qurumu səsini çıxartmır. Niyə..? Çünki hamısı bu cinayət əməlinə şərikdir. 
Birincisi, o boyda SSRİ dövləti  ağlını itirmişdi ki, yerin altında 18 km  alternativ su xətti çəkirdi..? 
Deməli, dövlət istənilən situasiyaya hazır olmalıdır. 
Təsəvvür edirsiniz, Qarqardan Ağcabədinin rayon mərkəzinə kimi uzanan 18 km-ə qədəri çuqun  boruların 1-inin uzunluğu 4,2 metr, çəkisi 534 kq-dır. 
İndi qoy hüquq-mühafizə orqanları  18 km borunun çəkisini və bazar qiymətini hesablasın. Və görsünlər ki, Şahin Məmmədov təkcə su borularından neçə milyonlar qazanıb.
Belə  nümunələrin sayını kifayət qədər artırmaq olar. 
Demək olar ki, bütün rayonlarda,  şəhərlərdə eyni vəziyyətdir. 
Yəni  son illər  metal-turba mafiyası bu yolla milyardlar qazanıb. 
Bir məsələni də xüsusi  qeyd edək ki, əgər icra başçısı, yaxud başqa  bir məmur qaz, su, meliorasiya  turbalarını  kəsib-doğrayıb satırsa,  bundan Azəriqaz-ın, Azərsu-nun, yaxud Azərmeliorasiya-nın necə xəbəri olmaya bilərdi..? 
Deməli, bu qurumlar bütün bu cinayət əməllərini müştərək ediblər. Bu aksiomadır. 
Bu məsələ hətta zamanında  sabiq Baş prokuror Zakir Qaralovun kabinetində müzakirə edilib və...yaşıl işıq yandırılıb. 
Bəli, konkret deyə  bilərik ki, hər dəfə turbaların oğurlanması ilə bağlı milyonluq məsələlər  Zakir Qaralovun kabinetində müzakirə olunanda son sözü “Qosprokuror”  deyirdi və  “faiz”ləri  müəyyən edirdi. Əgər belə olmasa idi o turbalara görə bir çox icra başçıları və onların işbaz dostları çoxdan həbsxanalarda cəza çəkirdilər.
Yəni bu  böyük bir mütəşəkkil  cinayətkar dəstədir. 
Və bizə nə qədər hədə-qorxu, təhdid-filan olsa da biz Gündəlik-Bakı olaraq  bu məsələnin sonadək araşdırılmasını  tələb edəcəyik. Ona görə ki, bu işdə Prezidentimizin verdiyi sərəncamlar, dövlət maraqları, dövlətçiliyimiz, büdcəmiz bizim üçün çox vacibdir. Bir məsələni başa düşmək olmur, bəzi məmurlar ancaq oğurlamağı, talan etməyi, bu gün nə qapdım-qapdım prinsipini üstün tuturlar. Bu tip məsələlərlə bağlı məqalələr dərc edən jurnalistləri isə pul müqabilində susdurmaq, pul götürməyəndə məhkəmə ilə hədələmək, vaxtını almaq, hədə-qorxu gəlmək, heç bir niyyətləri baş tutmayanda isə şərləmə prinsipinə keçirlər. Amma həmin jurnalistlərin bəziləri açıq-aşkar şəkildə həmin şərləyən məmurun üzünə deyir ki, mərhum Məmməd Arazın sözü ilə "Məni qınayanın beləsi belə" VƏ YA "Yalançının beləsi belə". Onda həmin məmur məzlum-məzlum adamın üzünə baxır. Hələ o sözü həmin məmurun övladlarının yanında deyəsən, gör onda nə baş verər.
Təsəvvür edirsiniz, bu cinayətkar dəstə  deyir ki, Prezidentin  dənizin dibi, yeraltı metal tullantılarla  bağlı göstərişi olub. Çox gözəl.
Bəs yerin altındakı bu  dəyəri milyardlar olan boruların, gəmilərin pullarını kimlər mənimsəyib..? 
Bu boruların və gəmilərin doğranılaraq satılmasından dövlət büdəcəsinə 1 manat daxil olubmu..? 
Bütün bu məsələlərlə bağlı biz Gündəlik-Bakı olaraq cənab Prezidentdən xahiş edirik ki, möhtəbər bir dövlət komissiyası yaradılsın və uzun illərdir metalların satışından dövlət büdcəsinə nə qədər vəsait daxil olubsa yoxlanılsın.
Qarşı tərəfin mövqeyini dərc etməyə hazırıq.