İsmayıllıda ağacları kəsib, meşənin ortasında  restoran, otel tikirlər…

Belə davam etsə, yaxın zamanda İsmayıllı meşələri yox olacaq…


30 ildir  mediamız yazırdı ki, Zəngilan meşələri erməni əlindən qan ağlayır...Kəlbəcər meşələri erməni daşnaklarının əlindən qan ağlayır... və s...
Bəli, erməni işğalçı vandalları meşələrimizi, təbiətimizi məhv edir, su mənbələrini, çaylarımızı  zəhərləyirdilər. 
Bunu haradasa başa düşmək olardı, çünki düşməndirlər. Amma...
Əmması odur ki, indicə İsmayıllı meşələri ilə bağlı  verdiyim axtarış zamanı oxşar başlıqlara rast gəldim:
İsmayıllı meşələri qan ağlayır...Cəlilabad meşələri qan ağlayır...Masallı meşələri qan ağlayır...Lerik meşələri qan ağlayır...Pirqulu meşələri qan ağlayır...
Yaxşı,  erməni işğalçılarını başa düşdük. Bəs indi təbiətimiz kimin, kimlərin əlindən qan ağlayır..? 
Sözün açığı, tam məsuliyyətlə demək lazımdır ki, erməni vandalla, bizim bəzi məmur vandalların heç bir fərqi yoxdur. 
Hər ikisi meşələrimizi, təbiətimizi məhv edir. 
Bir az mövzudan kənara çıxsam da qeyd edim ki, bu gün bir çox məmurların  qum-çınqıl sexləri var. Onlar çayların yatağındakı  qum-çınqılı  KAMAZ-larla Bakıya daşıyaraq satıb milyonlar qazanırlar. Amma bilimirlər ki, bu gec-tez təbii fəlakətə səbəb olacaq. 
Bəli, təbiət gec-tez öz qisasını alır. Bunu qulağınızda sırğa eləyib asın, ay mən deyən məmurlar. 
Dənizi hasarlayırsınız, meşələri məhv edirsiniz, dağları dağıdıb daş karxanasına çevirisiniz və daha nələr etmirsiniz...
Və bütün bunları görə-görə  Eklologiya və Təbii Sərvətlər nazirliyi adında  dövlət qurumu susur. 
Bəli, meşələrimiz məhv olmaq təhlükəsindədir. 
Nə qədər yazmaq olar ki, meşələr  təbiətimizin ağ ciyərləridir...
Nə qədər yazmaq olar ki, ağacı çox olan kəndin qəbirlərinin sayı az olar...
Bu  fəlsəfə daha işləmir ee...
Dövlət konkret tədbirlər görməlidir...
Bəli, dövlət konkret tədbirlər görməsə, yaxın illərdə yəqin ki, İsmayıllı meşələri deyilən təbiət qoruğu qalmayacaq. 
2004-cü ildən “ekonazir”in müavini olan və meşələrin bir nömrəli qənimi Firdovsi Əliyev bir müddət əvvəl  “meşə məsələlərindən”  kənarlaşdırıldı. Və onun səlahiyyətləri digər nazir müavini Vüqar Kərimova tapşırıldı. 
Hamı düşündü ki, meşələrin, göllərin, çayların canı Firdovsi müəllimdən qurtardı. Amma...
Əmması odur ki, sən demə, Vüqar Kərimov  Firdovsi müəllimdən də daha çox ağaclara qarşı qəddar imiş. 
Belə ki, İsmayıllıdan redaksiyamza daxil olan xəbərlərdən bəlli olur ki, nazir müavini Vüqar Kərimov köhnə meşəqıranaları vəzifədən uzaqlaşdırıb, özünə yeni  “ağac kəsənlər”  komandası yaradıb. Və Firdovsi müəllimin atasına rəhmət oxutdurur. 
Bəli, deyirlər ki, nazir müavini Vüqar Kərimov sanki İsmayıllıda “ekoloji soyqırım”la məşğuldur. 
Belə ki, İsmayıllıda  yüz illik ağacları kəsərək meşənin ortasında restoran  tikirlər.
Və restoranlar gecələr  əxlaqsızlıq yuvası kimi fəaliyyət göstərir. 
İndi aydın oldumu, bu harınlamış məmurlar  təmiz təbiətimizə də qara ləkə yaxırlar. 
Bütün bunlar azmış kimi nazirliyin tabeçiliyində olan Regional Meşə Təsərrüffatları Mərkızinə  meşə ilə heç bir əlaqəsi olmayan  şəxslər rəhbər, baş mühəndis və mütəxəssis  təyin olunur. 
Bəli, sakinlər onu da deyirlər ki, nazir müavini Vüqar Kərimov son bir ildə İsmayıllıda ağacları kütləvi qırdırıb  sexlərə göndərir.
Nazir müavini Vüqar Kərimov, təkcə  ağacları, meşələri məhv etmir, həm də sovet dövründə təhsil almış təcrübəli mütəxəssisləri də  ekologiya sistemindən qovub məhv edir. Və onların yerinə tarix müəllimini, zootexniki, hərbçini, mexanniki  təyin edir. 
Təsəvvür edin ki, meşənin funksiyasını bilməyən və hətta ağacların cinslərini belə tanımayan şəxsləri gətirib meşə sahəsinə rəhbər vəzifəyə qoyurlar. 
Nazir müavini  Vüqar Kərimov  2019-cu ildə Kənd Təsərrüfatı Nazirliyindən külli miqdarda mənimsəməyə görə qovulmuş Namiq Xırıdovu  Ekologiya Nazirliyinə Audit söbəsinin rəisi vəzifəsinə gətirib və 2020- ci ildə Meşələrin  Xidmət rəisi  vəzifəsinə təyin etmişdir. 
Bax, o gündən İsmayıllı və digər meşələrimizin qara günləri başlamışdır. 
Sonda onu da qeyd edək ki, nazir müavini Vüqar Kərimov PA-nın sabiq rəhbəri Ramiz Mehdiyevin  yaxın çevrəsinə aid olan şəxsdir. 
Sözün qısası, meşələrimiz qan ağlayır. Amma, bu dəfə ermənilrin deyil, Vüqar Kərimovların əlindən. 
Yəqin ki, bütün bu baş verən yaşıl terrordan Ekologiya naziri Muxtar Babayev xəbərsiz olmaz. 
Bəs onda niyə səsi çıxmır..? 
Bu artıq başqa mövzudur. 
Qarşı tərəfin mövqeyni dərc etməyə hazırıq.