Rövşən  Rzayev  Qaçqınların və Məcburi Köçkünlərin İşləri üzrə Dövlət Komitəsinin sədri  təyin olunanda çoxları düşünürdü ki, illərlə yığılıb qalmış  problemlər nəhayət həllini tapacaq. 
Amma tam əksini  müşahidə edirik.
Rövşən Rzayev də bəzi məmurlar kimi kresloya əyləşən kimi harada qohum-əqrəbası, dostu-tanışı var idi, yığıb gətirdi Qaçqınkoma. 
Onlardan biri də Komitənin Mənzil İstismar departamentinin direktoru  Səbuhi Əhmədovdur. 
Səbuhi Əhmədov  2003–2006-cı illərdə “Azneft” İstehsalat Birliyinin baş direktoru, sonradan Müdafiə Sənayesi naziri olan mərhum Yavər Camalovla yaxın dost olublar və həmişə ona güvənib. Səbuhi Əhmədov sonradan Yavər Camalovun dəstəyi ilə  Balaxanıneft  Neft Qaz Çıxarma İdarəsinin ( NQÇİ) rəisi olub. Və sonradan müxtəlif vəzifələrdə işləyib. 
Bir müddət Səbuhi Əhmədov media aləminə də baş vurub. O, rəhmətlik Aygün Şəmkirlinin qəzetinə  sponsorluq edirdi. Bu adamdan soruşan yox idi ki, 500 manat maaş alırsan, sən hansı pullarla sponsorluq edirsən ?  
Sonradan  Rövşən Rzayev komitə sədri olan kimi dostu Səbuhi Əhmədovu “ən yağlı, korrupsiyanın çiçəkləndiyi”  Departamentə rəis təyin edib. 
Səbuhi Əhmədov rəis olan gündən məcburi köçkünlər üçün tikilən binalardakı JEK rəisləri ilə birgə mənzilləri satmaqla, kiməsə bağışlamaqla məşğul olub. Mənzillərin bölgüsündə baş verən qanunsuzluqların memarı da Səbuhi müəllimdir. 
Bütün bunlar azmış kimi, Səbuhi Əhmədov qaçqınların hesabına daha çox qazanmaq üçün yollar arayıb. Və tapıb. 
Belə ki, məcburi köçkünlər üçün tikilən binaların, şəhərciklərin ətrafını kənardan gələn, məcburi köçkün olmayan şəxslərə satıb. Yəni ticarət obyekti kimi işlətmək üçün kənar  şəxslərə verib. Və həmin şəhərciklərdə  ayaq basmağa yer qoymayıb. 
Səbuhi Əhmədov qaçqınlara yaşadıqları mənzillərin guya mülkiyyət kağızını düzəltmək adı ilə dövlət rüsumu kimi 5-10 min manat pul alıb. Yəni qaçqınları aldadıblar ki, mənzillər sizə qalacaq. Ancaq indi məlum olur ki, həmin mənzillər dövlət fonduna aiddir.  
Bunu eşidən qaçqınlar, sonra obyekt sahibləri hər gün gələrək pullarını tələb edirlər. 
Konkret olaraq deyə bilərik ki, Zəngilandan olan məcburi köçkün Nəsimi Vəliyevdən dövlət rüsumu adı ilə  5 min manat pul alıblar. Hazırda bu məsələ ilə hüquq-mühafizə orqanları məşğul olur. 
Hazırda Səbuhi Əhmədov yığılan külli miqdarda pulların problemini Allah qoymasa JEK rəislərini vəzifədən çıxarmaqda görür. 
Guya JEK rəislərini çıxarmaqla  qaçqınların pulu qayıdır ? 
Yəqin ki, yaxın zamanlarda bu məsələ ölkə rəhbərliyinin diqqətini cəlb edəcək. 
Bu pullara görə, Səbuhi Əhmədovu nə gözləyir, bunu zaman göstərəcək. 
P.S. Növbəti  yazıda Səbuhi Əhmədovun tenderlərdən qazandığı pullardan bəhs edəcəyək.